د کورنیو چارو وزارت مطبوعاتي اعلامیه
د بهسود د امنیتي وضعیت څارونکي پلاوي خپلې موندنې له کورنیو چارو وزارت سره شریکې کړې.
د میدانوردک ولایت د بهسود ولسوالۍ د امنیتي وضعیت ګډ څارونکی امنیتي پلاوی چې تېره اونۍ یادې ولسوالۍ ته تللی و، له متنفذینو سره یې د کتنې په ترڅ کې د دې ولسوالۍ امنیتي وضعیت له نږدې وارزوه او پایله یې له کورنیو چارو وزارت سره شریکه کړه.
کورنیو چارو وزارت د یاد پلاوي د موندنو پر بنسټ د میدانوردک ولایت د بهسود مېشتو ملکي مرګ ژوبله په جدي ډول څېړي.
د کورنیو چارو وزارت مشرتابه د همدې قضیې په پار د میدانوردکو امنیه قوماندان کابل ته راغوښتی، څو موضوع په بشپړ ډول وارزوي او د سرغړوونکو د پېژندنې په صورت کې به د دوی پر وړاندې د قانون په رڼا کې عمل ترسره شي.
د هېواد د ملي امنیتي او دفاعي ځواکونو مشرتابه ډاډ ورکوي، چې اتل امنیتي او دفاعي ځواکونه به د قانون د تنفیذ او همدارنګه د خلکو د امنیت ساتنې په برخو کې له هېڅ راز هڅو ډډه ونه کړي او له افغانستان څخه د دفاع سپېڅلې دندې به د ترهګرۍ پر وړاندې د مبارزې په برخو کې په بې پرې ډول ترسره کړي.
