د سیګار د راپور په تړاو د کورنیو چارو وزارت اعلامیه
د افغانستان اسلامي جمهوریت د کورنیو چارو وزارت، د نشه يي توکو پر وړاندې د مبارزې د ځانګړو ځواکونو په اړه د افغانستان د بیا رغونې لپاره د امریکا د څار عمومي ادارې راپور چې د یادو ځواکونو لاسته راوړنو او ظرفیت ته په کې اشاره شوې، ستايي او تاییدوي.
څرنکه چې په دې راپور کې اشاره شوې، چې د نشه يي توکو پر وړاندې د مبارزې ځانګړو ځواکونو د ۲۰۲۰ زېږدیز کال په لړ کې د نشه يي توکو ضد ۸۷ مهم عملیات د افغانستان په بېلابېلو برخو کې ترسره کړي او په ترڅ کې یې ۱۵۰ ټنه چرس، څه باندې ۳۳۰۰ کیلوګرامه تریاک، ۴۴۴ کیلوګرامه هیرویین، ۷۷ کیلوګرامه امفتامین او د نشه يي توکو ۷۰ لوی قاچاقبران نیول شوي دي؛ چې دا د نشه يي توکو پر وړاندې د مبارزې په برخه کې د دې ځواکونو د ورځ تر بلې ځواک زیاتوالی ښيي.
کورنیو چارو وزارت د "سیګار" د یاد راپور د تایید تر څنګ زیاتوي، چې د هېواد امنیتي او دفاعي ځواکونه په تېره بیا د نشه يي توکو پر وړاندې د مبارزې ځانګړي ځواکونه غوره ظرفیتونه او ځانګړنې لري او د نشه يي توکو پر وړاندې خپلواک عملیات چې په هېواد کې د ترهګرو ډلو مالي سرچینې شمېرل کېږي، ترسره کوي.
