عبدالنافع ټکور د ولسي شرطې او ۱۱۹ د رئیس په توګه معرفي او کار یې پیل کړ

​عبدالنافع ټکور د کورنیو چارو وزارت د عامه اړیکو د لوی ریاست اړوند د ولسي شرطې او ۱۱۹ د رئیس په توګه د یوې غونډې په ترڅ کې د یاد ریاست کارمندانو ته معرفي او په رسمي ډول یې خپله دنده پیل کړه.
​دا غونډه چې د ولسي شرطې د ریاست په دفتر کې جوړه شوې وه، د عامه اړیکو عمومي رئیس مولوي عبدالحکیم همت آخندزاده، د کورني امنیت عمومي رئیس مولوي سلطان محمد مفکر، د کورنیو چارو وزارت د پالیسۍ سلاکار مولوي رحمت‌الله کاکازاده او د دې وزارت یو شمېر نورو رئیسانو په کې ګډون درلود.
​په دې غونډه کې مولوي رحمت‌الله کاکازاده د اسلامي نظام د حاکمیت پر اهمیت خبرې وکړې او ویې ویل چې الحمدلله په ټول هېواد کې اسلامي نظام واکمن دی او په راس کې یې علماء او شیوخ قرار لري.
​ورپسې مولوي سلطان محمد مفکر په ادارو کې بدلون او تبديلي یو اداري اصل وبللو او د مسوولینو پر ویښتیابه او د مسوولیت پر احساس یې ټینګار وکړ. هغه وویل چې د مسوولینو له خوا د دندو سمه او مسوولانه ترسره کول کولای شي د خلکو د آرامۍ او هوساینې زمینه برابره کړي. نوموړي همدا راز پر مسوولیت منلو او د کاري کیفیت پر لوړولو ټینګار وکړ.
​د پروګرام په دوام کې مولوي عبدالحکیم همت آخندزاده د ولسي شرطې او ۱۱۹ ریاست د کاري استقامت او اهمیت په اړه خبرې وکړې او ویې ویل چې ولسي شرطه د خلکو او د کورنیو چارو وزارت ترمنځ د اړیکو پُل دی.
هغه همدا راز د جنایي راپورونو په ترلاسه کولو، د بېلابېلو جرمونو په کشف او مبارزه کې د ۱۱۹ شمیرې رول خورا حیاتي وباله او زیاته یې کړه چې د ولسي شرطې له خوا په ولایتونو او ولسوالیو کې د شوراګانو جوړول کولای شي د امنیت په ټینګښت، د "ولس او شرطې" ترمنځ د همکارۍ په پیاوړتیا او د جرمونو په مخنیوي کې اغېزمن رول ولوبوي.
​د غونډې په پای کې د کاري بهیر پر ښه والي، له خلکو سره د اړیکو پر پیاوړتیا او هېوادوالو ته د ښو او پر وخت خدماتو پر وړاندې کولو ټینګار وشو.