د کورنیو چارو وزیر قدرمن خلیفه سراجالدین حقاني د جاپان له سفیر ښاغلي تاکویوشي کورمایا سره په کابل کې ولیدل.
په دې لیدنه کې چې د ښاغلي کورمایا تاکویوشي د ماموریت د ختمېدو له امله تر سره شوه، قدرمن خلیفه صاحب د تاکویوشي د ماموریت پر مهال د هغه ډیپلوماټیک خدمت او د دواړو هېوادونو تر منځ د تعامل په لا ښه کولو کې د هڅو ستاینه وکړه. خلیفه صاحب وویل: د جاپان او افغانستان اړیکې ډېرې پخوانۍ دي او همېشه د دواړو هېوادونو تر منځ روغ تعامل حاکم پاتې شوی دی.
ښاغلي تاکویوشي په امنیت او نورو برخو کې پرمختګونه هیله بښونکي وبلل او د افغانانو لپاره یې د لا ښې راتلونکې هیله وکړه. نوموړي وویل: جاپان به د ملګرو ملتونو په چوکاټ کې د بدیل معیشت، د مخدره موادو پر وړاندې مبارزې او د روږدو کسانو د درملنې په برخو کې خپلو مرستو ته دوام ورکړي.