د بغلان په نهرین ولسوالۍ کې د ترهګریز برید په تړاو د کورنیو چارو وزارت اعلامیه
د افغانستان اسلامي جمهوري د کورنیو چارو وزارت د بغلان ولایت په نهرین ولسوالۍ کې پر ملکي خلکو د ترهګرو طالبانو برید چې پکې زموږ یو شمېر ملکي هېوادوال شهیدان او ټپيان شوي، یو جنایتکاره عمل ګڼي او دا جنایت په کلکو ټکو غندي.
تېره شپه ترهګرو طالبانو د نهرین ولسوالۍ په اره کش کلي کې پر ملکي خلکو برید کړی، چې په ترڅ کې یې ۲۵ تنه د سیمې ملکي مېشتي شهیدان شوي او دوه نور یې ټپیان شوي دي.
ملي پولیس هم د ملکي خلکو د مرستې لپاره د پېښې سیمې ته تللي او ترهګرو طالبانو ته د ځوابیه غبرګون په لړ کې یې ۱۵ ترهګر طالبان وژلي دي.
د افغانستان اسلامي جمهوري د کورنیو چارو وزارت زموږ د هېوادوالو د ساتنې په موخه یو ځل بیا ملي پولیسو ته دستور ورکوي، چې د ملکي خلکو د ساتنې او ژغورنې په برخه کې له هر ډول امکاناتو ګټنه وکړي او ترهګرو ته اجازه ورنه کړي چې ملکي خلکو ته زیان ورسوي.
پر ملکي خلکو برید ښيي، چې ترهګر طالبان د افغانستان له خلکو سره د دښمۍ په برخه کې هېڅ فرصت له لاسه نه ورکوي او هېڅ ډول اصول او اخلاق نه پېژني او دا شیطان صفته ډله تل سوله غوښتونکو خلکو ته د زیان رسونې په لټه کې ده.
د افغانستان اسلامي جمهوري د کورنیو چارو وزارت د نهرین ولسوالۍ شهیدانو ته فردوس جنت او پاتې شونو ته یې د لایزال ذات څخه جمیل صبرغواړي.
