د هېواد په څلورو ولایتونو کې له ۲۳ ماین چاودنو مخنیوی شوی
د خوست، سرپل، هرات او فاریاب ولایتونو د امنیه قوماندانیو منسوبینو د یادو ولایتونو په اړوند سیمو کې د څو جلا عملیاتو په ترڅ کې د ترهګرو ۲۳ کړۍ ځای پر ځای شوي ماینونه کشف او شنډ کړي دي.
ترهګرو د سرپل ولایت په مرکزي سیمو او دویمه ناحیه کې پنځه کړۍ ماینونه، د هرات ولایت په زاول ولسوالۍ کې درې کړۍ بشکه يي ماینونه او په فاریاب ولایت کې هم یو کړۍ ریموټ کنټرول ماین د ترورېستي پېښو په موخه ځای پر ځای کړي وو، چې هدف ته له رسېدو مخکې کشف او له منځه وړل شوي دي.
په همدې حال کې؛ د خوست ولایت د امنیه قوماندانۍ منسوبینو هم په مرکز او ولسوالیو کې د څو بېلو عملیاتو په پایله کې ۱۴ کړۍ ماینونه چې د ترهګریزو پېښو لپاره یې ځای پر ځای کړي وو، کشف او شنډ کړي دي.