د کورنیو چارو وزارت د امنیتي چارو ستر معین غور ولایت ته سفر وکړ

د کورنیو چارو وزارت د امنیتي چارو ستر معین، ستر پاسوال الحاج ملا محمد ابراهیم "صدر"، د یوه لوړپوړي امنیتي پلاوي په مشرۍ غور ولایت ته سفر وکړ او هلته یې له ملکي او نظامي مسئولینو سره وکتل.
غور کې په همدې موخه جوړه شوې غونډه کې د غور والي الحاج مولوي حیات‌الله مبارک، امنیه قومندان مل پاسوال ملا نورآقا حیدر او یو شمېر نور ملکي او نظامي مسئولین شتون درلود.
د غور والي د امنیتي چارو ستر معین او مل پلاوي هرکلی وکړ او ډاډ یې ورکړ چې په دغه ولایت کې د امنیتي ادارو ترمنځ ښه همغږي شتون لري، د پام وړ امنیتي ګواښ نه محسوسېږي او د خلکو او دولت ترمنځ اړیکې د ورورولۍ پر بنسټ ولاړې دي.

ښاغلي صدر د یاد ولایت د مسئولینو له هڅو مننه وکړه او ټینګار یې وکړ چې ټول دولتي بنسټونه باید په اخلاص سره خلکو ته د خدمت، امنیت ټینګښت او د اسلامي شریعت د پلي کېدو لپاره کار وکړي. نوموړي له چارواکو وغوښتل چې ولسوالیو ته سفرونه وکړي، د خلکو ستونزې له نږدې وڅېړي او د حل لپاره یې اقدام وکړي.

په پای کې د امنیتي چارو ستر معین ټینګار وکړ چې د امنیې قوماندانۍ مشرتابه باید پر خپلو قطعاتو او جزوتامونو دوامدار نظارت ولري او د هغوی اړتیاوو ته لازمه پاملرنه وکړي.