فارياب کې د يو ځوان د شکنجه کولو په تړاو شپږ عاملين ونيول شول.
د فارياب ولايت په بلچراغ ولسوالۍ کې د يوه ځوان بې رحمه او وحشيانه ډول شکنجه کول په هيڅ صورت د توجيې وړ نه دي او له عاملينو سره به يې جدي او قانوني چلند وشي.
د کورنيو چارو وزارت مشرتابه ددغې بوږنوونکي پېښې وروسته د فارياب د پوليسو ځایي مسوولينو ته لارښوونه وکړه چې ددغه جنايتکارانه عمل عاملين ژر تر ژره وپيژني او ونيسي.
د یادې پېښې په تړاو ۱۰ تنه تورن کسان پېژندل شوي وو چې ۶ تنه یې پولیسو نیولي او پاتې یې تر جدي څار لاندي دي.
د پولیسو د لومړنیو څېړنو پر بنسټ د یاد ځوان شکنجه د یو کور دننه د شخصي او قومي دوښمنۍ له کبله وه، چې په دې تړاو د پولیسو لا نورې څېړنې روانې دي.