۷ ولایتونو کې؛ پولیسو ۱۶ تنه نیولي او وسلې او مهمات یې ترلاسه کړي

امنیتي ځواکونو له وروستیو ۲۴ ساعتونو راهیسې په نیمروز، بادغیس، کاپیسا، غور، بغلان، خوست او فاریاب کې  ۱۶ تنه د غلا، وژنې، بډو اخیستو او له کوره د تېښتې په تړاو نیولي دي.

له منځه یې، بادغیس کې څلور تنه د وژنې په تړاو، نیمروز کې څلور غله او یو تن د اداري فساد په تړاو، کاپیسا کې درې تنه د وژنې په تړاو، یو غل په غور، دوه تنه په بغلان کې له کوره د تېښتې په تړاو او یو تن په خوست کې د بډو اخیستو په تړاو نیول شوی دی.
ورته مهال، ترهګرۍ سره د مبارزې پولیسو په فاریاب او غزني کې یو اندازه وسلې او مهمات موندلي او ضبط کړي دي.