په هرات ولایت کې د ملګرو ملتونو سازمان پر دفتر د ترهګرو طالبانو د برید په تړاو د کورنیو چارو وزارت اعلامیه
ترهګرو طالبانو نن سهار د هرات ولایت په ګذرې ولسوالۍ کې د ملګرو ملتونو (یونما) پر دفتر برید کړی، چې له امله یې د عامه ساتنې ملي تصدۍ یو ساتونکی شهید شوی او درې نور ټپیان شوي دي.
ملي پولیسو ځواکونو په ګذرې ولسوالۍ کې د ترهګرو د دې برید پر مهال د ملګرو ملتونو د دفتر ۱۳ تنه بهرني کارکوونکي ژغورلي او پر یونما دفتر یې د ترهګرو طالبانو برید شنډ کړی دی.
کورنیو چارو وزارت په هرات ولایت کې د ملګرو ملتونو (یونما) پر دفتر برید په کلکو ټکو غندي او د عامه او دولتي بنسټونو د ساتنې سربېره، په افغانستان کې د بهرنیو هېوادونو د دفترونو پر امنیت ساتنې ځان مکلف ګڼي.