د کورنیو چارو وزارت اعلامیه
په وروستیو کې ځینو نفوذي کسانو په کلیو کې له ترهګرو طالبانو سره د امنیتي پوستو په تسلیمۍ کې هڅه کړې ده. تر اوسه د دې قضیې په تړاو په نورستان، سرپل، فاریاب او بادغیس ولایتونو کې ګڼ کسان نیول شوي دي.
د کورنیو چارو وزارت د نوماند او سرپرست وزیر جنرال عبدالستار میرزکوال د تازه پرېکړې پر بنسټ، هر هغه کس چې په دې ډول اقدام لاس پورې کړي، د امنیتي ځواکونو له لوري نیول کېږي او څارنوالۍ ته ور پېژندل کېږي.
د هېواد امنیتي او دفاعي ځواکونه په پوره قوت او قهرمانۍ سره د افغانستان د دوښمنانو پر وړاندې مبارزه کوي او خلک د خپلو امنیتي او دفاعي ځواکونو تر څنګ له خاورې، مال، ځان، ناموس او ارزښتونو څخه د دفاع په پار درېدلي دي.
د هېواد امنیتي او دفاعي ځواکونه د خلکو له همېشنۍ همکارۍ څخه مننه او درناوی کوي او هېچا ته د امنیت د اخلال اجازه نه ورکوي.