خوست کې د نشه یي توکو ۲۲ تنه پلورونکي او قاچاق کوونکي ونیول شول

​د خوست ولایت امنیتي مسوولینو په تېرو دوو اونیو کې د یاد ولایت په مرکز او بېلابېلو ولسوالیو کې د کشفي عملیاتو پر مهال ۲۲ تنه د نشه یي توکو د قاچاق او پلور په تړاو نیولي دي.
​دا عملیات د خوست امنیه قوماندانۍ له نشه یي توکو سره د مبارزې مدیریت د منسوبینو له لوري د لومړۍ، دویمې، څلورمې او نهمې امنیتي حوزو ترڅنګ په ګربزو، تڼیو، باک، اسماعیل خېلو/ مندوزیو، صبریو او شمل دوه منده ولسوالیو کې ترسره شوي دي.
​له نیول شویو کسانو څخه سلګونه دانې نشه یي (زیګاپ) ګولۍ، ټابلېټ کا، شیشه، چرس او هیرویین ترلاسه شوي دي. 
یادو کسانو په خپلو اعترافاتو کې منلې چې دغه توکي یې د خرڅلاو او قاچاق په موخه ساتلي وو.