د افغانستان اسلامي جمهوریت د کورنیو چارو وزارت د ملګرو ملتونو له نوملړ څخه د افغانستان د ملي پولیسو د نوم حذفولو هرکلی کوي
د افغانستان د ملي پولیسو د عمل پلان له مخې چې په وسیله یې د افغان ملي پولیسو په لیکو کې له ۱۸ کلونو د کم عمره ماشومانو له ګومارنې د مخنیوي سربېره، د دوی پر وړاندې د تاوتریخوالي د کمېدو لامل شوی؛ د افغانستان د ملي پولیسو نوم د ملګرو ملتونو له نوملړ څخه لرې شو.
د ملګرو ملتونو د سرمنشي د ۲۰۲۰ کال په راپور کې د افغانستان د ملي پولیسو په لیکو کې له ۱۸ کلونو د کم عمره ماشومانو له ګومارنې د مخنیوي او همداراز د دوی پر وړاندې د تاوتریخوالي کچې د ټیټېدلو چاره بریالۍ ښودل شوې او له همدې کبله د ملګرو ملتونو له نوملړ څخه د افغانستان د ملي پولیسو نوم حذف شوی دی.
د ملګرو ملتونو له نوملړ څخه د افغانستان د ملي پولیسو د نامه حذفېدل د افغان ملي پولیسو پرمختګ او پراختیا ښیي.
کورنیو چارو وزارت په بېلابېلو برخو کې د اصلاحاتو د راوړنې تداوم او تقویې ته ژمن دی او له همدې امله د ملي پولیسو په لیکو کې د اصلاحي پلانونو د تطبیق په درشل کې دی.
