کورنیو چارو وزارت د ترافیکي پېښو د مخنیوي په موخه عاجله غونډه ترسره کړه
کابل – د کورنیو چارو وزارت د دفتر رییس لوی پاسوال مولوي زینالله عابر په مشرۍ نن د ترافیکي پېښو د مخنیوي په موخه عاجله غونډه جوړه شوه.
یاده غونډه چې د کورنیو چارو وزارت په مقر کې ترسره شوه د وزارت د امنیتي چارو د ستر معینیت مرستیال لوی پاسوال مولوي عطاالله انوري، د کابل امنیه قومندان پاسوال ملا ولي جان حمزه، د مقام د دفتر سر یاور مولوي عبدالرحیم ثاقب، د ترافیکو لوی رییس انجینر سید رحیم جاهد او د پالیسۍ او ستراتیژۍ معینیت علمي او مسلکي مرستیال مولوي شمس الدین ابومنصور پکې ګډون کړی و.
د غونډې موخه د کابل ـ کندهار پر لویه لار د وروستیو ترافیکي پېښو د مخنیوي او شننې په اړه وه چې له امله یې ګڼ شمېر هېوادوالو ته مرګ ژوبله واوښته. د غونډې ګډونوالو د ترافیکي پېښو د مخنیوي او د عامه خونديتوب د ښه والي لپاره اړینې لارښوونې او سپارښتنې وړاندې کړې.
په ناسته کې د ترافیکي پېښو د مخنیوي پر عملي لارو چارو بحث وشو او د ترافیک پولیسو او عامه امن پولیسو تر منځ پر دوامدارې همغږۍ ټینګار وشو. همداراز پرېکړه وشوه چې د امنیتي چارو د ستر معینیت په همغږۍ هغه مسافر وړونکي موټر چې د ترافیکي قوانینو سرغړونه کوي، ودرول شي او د کابل امنیه قومندانۍ پولیس د سرغړونکو د نیولو په برخه کې عملي ګامونه پورته کړي.