کندز کې پولیسو سره په نښته کې یو وسله وال غل وژل شوی او درې نور نیول شوي
د کندز ولایت د امنیه قومندانۍ منسوبینو د مرکز کندز ښار په اړوند " حوزوي روغتون" سیمه کې د یو لړ عملیاتو په ترڅ کې یو وسله وال غل وژلی او درې نور یې نیولي دي.
تېره شپه وسله وال غله یوه درملتون ته دننه شوي او د دې درملتون څښتن یې د وسلې په وسیله ګواښلی او د دوه میلیونه افغانیو غوښتنه یې ترې کړې وه؛ کله چې یې پام کېږي چې د پولیسو لخوا محاصره شوي، د پولیسو خبرداري ته غاړه نه ږدي او پر پولیسو ډزې کوي؛ چې د متقابلې نښتې په پایله کې یو غل وژل کېږي او درې نور ژوندي نیول کېږي.