کابل، هلمند او هرات کې پنځه تنه د نشه يي توکو د پلور او قاچاق په تړاو ونیول شول
د نشه يي توکو پر وړاندې د مبارزې منسوبینو د کابل، هلمند او هرات ولایتونو په اړوند سیمو کې د څو جلا عملیاتو په ترڅ کې پنځه تنه د نشه يي توکو د پلور او قاچاق په تړاو نیولي دي.
د یادو کسانو له ډلې؛ د کابل د حامد کرزي په نړیوال هوايي ډګر کې دوه تنه د هیرویینو د قاچاق، یو کس په هلمند ولایت کې او دوه تنه نور هم په هرات ولایت کې نیول شوي دي.
له نیول شویو کسانو څخه یو اندازه چرس او هیرویین هم ترلاسه شوي او نسبتي دوسیې یې تر لومړنیو څېړنو وروسته اړونده بنسټ ته سپارل شوې دي.