د کورنیو چارو وزارت سرپرست د پولیسو په لیکو کې د مکافاتو او مجازاتو د اصل پر تطبیق ټینګار وکړ
د کورنیو چارو وزارت مشرتابه غونډه نن له غرمې مخکې د ترسره شویو چارو او همدارنګه د شته ننګونو د ارزونې په پار د جنرال عبدالستار میرزکوال په مشرۍ او د وزارت د معینانو او رییسانو په ګډون ترسره شوه.
د دې غونډې په سر کې د کورنیو چارو وزارت د نشه یي توکو پر وړاندې د مبارزې او همداراز تامیناتي معینانو د پولیسو تجهیزاتو او اړتیاوو ته د رسېدنې د څرنګوالي بهیر او د نشه یي توکو پر وړاندې د مبارزې د روانو چارو راپورونه وړاندې کړل او شته ننګونې یې د وزارت له مشرتابه سره شریکې کړې.
جنرال عبدالستار میرزکوال د راپورونو تر اورېدنې وروسته مسوولینو ته هدایت ورکړ، څو د پولیسو د اړتیاوو او ستونزو د رسېدنې په برخه کې په بېړه اقدام وکړي.
د کورنیو چارو سرپرست وزیر په دې غونډه کې د پولیسو په لیکو کې د مکافاتو او مجازاتو د اصل پر تطبیق ټینکار وکړ او خبرداری یې ورکړ چې په دې برخه کې هېڅ ډول وظیفوي غفلت او ناغېړي د منلو نه ده.