د کورنیو چارو سرپرست وزیر د لویدیځ زون د علماوو او روحانیونو شورا له رییس شیخ الحدیث مولوي خداداد صالح سره وکتل

د کورنیو چارو وزارت سرپرست جنرال عبدالستار میرزکوال د نظام د ارزښتونو په ساتنه کې د علماوو نقش د پام وړ یاد کړ او د هېواد له ملي امنیتي او دفاعي ځواکونو د ملاتړ له امله یې د علماوو شورا له مشر او د لویدیځ زون له روحانیونو مننه وکړه. 
په دې کتنه کې؛ مولوي خداداد صالح د هېواد امنیتي او دفاعي ځواکونو ته د اختر مبارکۍ ترڅنګ وویل، چې له دیني ارزښتونو او همداراز له هېواد څخه دفاع دیني وجیبه ده او له ملي امنیتي او دفاعي ځواکونو یې د بېلابېلو قشرونو پر ملاتړ ټینګار وکړ. 
د کورنیو چارو سرپرست وزیر زیاته کړه، پداسې حال کې چې امنیتي ځواکونه له خلکو د ساتنې په برخه کې کوښښ کوي؛ خو دوښمن بیا په وژنو، نښتو او د عامه بنسټونو په ویجاړولو لاس پورې کوي او امنیتي او دفاعي ځواکونه بیا د هېواد په ګوټ ګوټ کې د خپلې مشروع مبارزې پر بنسټ د دوی پر وړاندې په پوره قوت سره درېدلي دي.