خبرتیا
د کورنیو چارو وزارت د حیواناتو د حفاظت او د ښکاري وسلو ( چره یي، موشکش، سپورتي او عتیقه) په غیر قانوني توګه د لیږد را لیږد او ساتلو لپاره د یادو وسلو لپاره کړنلاره جوړه کړې چې ۴ فصلونه او ۱۷ مادې لري.
مهم ټکي یې په لاندې ډول دي:
١. د کورنیو چارو وزارت د جرمونو د موندلو او مبارزې لوی ریاست د نا مسوولو ډلو د بې وسلې کولو ډایاک لوی مدیریت، د ښکاري ټوپکونو د واردولو او ترانزیت د جوازنو د صدور یوازینۍ مرجع ده.
٢. د ښکاري ټوپکونو، د واردولو هغه غوښتوونکي چې تجارتي جوازنامې لري، هغوی ته د کورنیو چارو وزارت له لوري جلا جوازونه ورکول کیږي.
٣. د تجارتي جواز درلودونکي حقیقي او حکمي اشخاص، د کورنیو چارو وزارت لخوا د ځانګړي جواز په اخیستو سره، د ښکاري ټوپکونو، د واردولو او ترانزیت په برخه کې، فعالیتونه تر سره کولای شي.
٤. د ښکاري ټوپکونو د واردولو او ترانزیت جوازونه، د خپلو مالکانو څخه پرته بل هیڅ چاه ته د لیږد وړ ندي، د سرغړونکو سره قانوني چلند کیږي.
٥. په مرکز کې د ښکاري وسلو د ګرځولو جواز غوښتونکي د غوښتنلیک فورمه د کورنیو چارو وزارت د عامه خدمتونو د ریاست څخه تر لاسه کولای شي او په ولایتونو کې د امنیه قومندانیو د ډایاک د معاونیت څخه او په ولسوالیو کې د امنیه قومندانیو د ترهګری سره د مبارزې مدیریت څخه تر لاسه کولای شي.
٦. د ښکاري ټوپکونو د واردولو د جواز، درلودونکي کولای شي چې د استازولۍ د اجازه لیک د لاسته راوړلو څخه وروسته په خرڅلاو لاس پورې کړي.
٧. د دې کړنلارې له پلي کیدو وروسته د ښکاري وسلو خاوندان کولای شي، د شپږو میاشتو په موده کې، د خپلو وسلو د ثبت او راجستر په هکله اقدام وکړي.
٨. د اتوماتو چره یي ښکاري ټوپکونو واردول په جدي توګه منعه دي.
٩. موجوده اتومات چره یي ټوپکونه چې پخوا وارد شوي د کړنلارې سره سم په شرایطو برابرو اشخاصو ته د وسلو د ګرځولو جواز ورکول کیږي.
١٠. هغو کسانو ته چې دې با صلاحیته محکمې له خوا د جنایي جرمونو له امله په مجازاتو محکوم شوي دي، د ښکار د وسلو د وړلو او ساتلو د جوازونو ویش نه تر سره کیږي.
په شرایطو وړ کسان کولای شي چې د (ښکاري وسلو څخه د ګټې اخیستنې پوره کړنلاره) د کورنیو چارو وزارت له ویب پانې د اسنادو او قوانیو له څانګې څخه واخلي او د معلوماتو له اخیستو وروسته خپلې ښکاري وسلې ثبت او راجستر کړي.
ښکاري وسلو څخه د ګټې اخیستنې پوره کړنلاره دانلود
