د کورنیو چارو وزارت اعلامیه
کورنیو چارو وزارت هغه خبرونه په کلکه ردوي، چې ګواکې نن امنیتي ځواکونو په کندز ښار کې پر لاریون کوونکو ډزې کړې دي.
نن ماسپښین شاوخوا ۰۳:۱۵ ترهګرو طالبانو او د افغانستان د خپلواکۍ او دیموکراسۍ دښمنانو په کندز ښار کې د ټاکنو د خپلواک کمېسیون پر دفتر هاوان ګولۍ توغولې، چې په ترڅ کې يې یو ملکي شهید شوی او د ملي امنیت د یوه منسوب په ګډون څلور ملکیان ټپیان شوي دي.
د افغانستان د اساسي قانون د ۳۶مې مادې پر بنسټ د دې هېواد اتباع حق لري څو خپلو جایزو او سوله ییزو موخو ته د رسېدو لپاره له وسلو پرته غونډې او لاریونونه پر لاره واچوي او امنیتي ځواکونه هم د لاریون کوونکو پر امنیت ساتنې مکلف شوي دي.
افغان امنیتي ځواکونو د ولسمشرۍ ټاکنو ټول پړاوونه په بشپړې بېطرفۍ ترسره کړي او د ټاکنو د څار بنسټونو د تایید وړ ګرځېدلي دي.
کورنیو چارو وزارت خپلو ټولو هېوادوالو ته ډاډ ورکوي، چې امنیتي ځواکونه د ټاکنو د پاتې پړاوونو د بشپړولو لپاره هم په پوره بېطرفۍ سره تیارى لري او هېچا ته به د دې اجازه ورنه کړي، چې د ټاکنو په ملي بهیر کې مداخله وکړي.
