کابل کې د تېرې شپې د ترهګریزې پېښې په تړاو د کورنیو چارو وزارت اعلامیه
تېره شپه شاوخوا ۱۰:۴۰ بجې د کابل ښار د شپږمې امنیتي حوزې اړوند د فیض محمد کاتب سړک په سیمه کې یوه ترهګر د "شهر دُبی" په هوټل کې داسې مهال له چاودېدونکو توکو یوه ډک واسکټ ته چاودنه ورکړه، چې په هوټل کې دننه د واده مراسمو جریان درلود.
په دې پېښه کې د ښځو او ماشومانو په ګډون ۶۳ ملکیان شهیدان شوي او ۱۸۲ نور ټپيان شوي دي.
کورنیو چارو وزارت اړونده بنسټونو ته سپارښتنه کړې، ترڅو د دې پېښې څرنګوالی وڅېړي او د پېښې وروستي جزییات به په تفصیل سره وړاندې کړي.
کورنیو چارو وزارت د دې پېښې د غندلو ترڅنګ دا یو غیرانساني، ضد بشري او د ټولو بشري موازینو خلاف عمل ګڼي او خپل د تسلیت او خواخوږۍ مراتب د افغانستان ټولو خلکو ته په ځانګړې توګه د شهیدانو کورنیو ته وړاندې کوي او ټپیانو ته یې د بېړنۍ روغتیا غوښتنه کوي.
