د میدانوردک په بهسود ولسوالۍ کې د لاریونونو د څېړنې په تړاو درېیمه شمېره اعلامیه
کورنیو چارو وزارت د میدانوردک ولایت په بهسود ولسوالۍ کې د ترسره شویو لاریونونو په اړه د څېړونکي پلاوي د موندنو پر بنسټ خپلې ارزونې په ټولیز ډول ترسره کړې دي.
د ارزونو او یادو راپورونو له مخې؛ په بهسود ولسوالۍ کې د ۱۳۹۹یم کال د سلواغې په ۱۰مه د جمعې پر ورځ د ترسره شویو لاریونونو ګډونوال غیرمسلح کسان وو. کله چې لاریونونه په تاوتریخوالي واوښتل، نو له امله یې ۱۱ تنه ملکیان شهیدان شوي او ۳۱ تنه ژوبل دي.
کورنیو چارو وزارت د همدې قضیې په تړاو د میدانوردکو د امنیه قوماندان دنده ځنډولې او قضیې یې څارنوالۍ ته لېږدولې، څو د قانون په رڼا کې په بنسټیز ډول وارزول شي او عدالت تامین شي.
کورنیو چارو وزارت په یاد قضیه کې زموږ د هېوادوالو د شهادت او ژوبلې په تړاو د دوی کورنیو ته د تسلیت او خواخوږۍ ژور مراتب وړاندې کوي او ټپيانو ته یې د بېړنۍ روغتیا غوښتنه کوي. د دې پېښې ټپيان د پولیسو په ۳۰۰ بستریز روغتون کې په وړیا ډول تر درملنې لاندې دي او د بهسود پېښې د شهیدانو کورنیو ته به جدي رسېدنه وشي.
کورنیو چارو وزارت ډاډ ورکوي، چې د حصې اول او دویم ولسوالۍ اداري واحدونه به بیاځلي فعال شي او خپلو هېوادوالو ته به چوپړتیاوې وړاندې کړي.
