د کورنیو چارو وزارت لاسته راوړنی د ۱۳۹۰ لمریز کال په بهیر کی
نیټه : د سلواغی ۲۴ مه
کابل - دکورنیو چارو وزارت
د کورنیو چارو وزارت لاسته راوړنی د ۱۳۹۰ لمریز کال په بهیر کی
د کورنیو چارو وزارت په تیرو ۱۱ میاشتو کې تردی دمه د هغو پراخو برنامو په عملی کولو سره او د کورنیو چارو وزیر د شپږو کاری لمړیتوبونو په رڼا کې توانیدلی دی چی یو لړ د منلو وړ لاسته راوړنی ولری چی په مختصره توګه یی په لاندی ډول تاسی ته وړاندی کوو.
د تشکیل په برخه کی: د ملی پولیسو تشکیل د یوسلو دوویشت زرو ۱۲۲۰۰۰ څخه ۱۵۰۰۰۰ یو سلو پنځوس زرو تنو ته لوړ شوی او دم ګړی ۱۴۹۰۰۰ یو سلو نهه څلویښت زره تنه ملی پولیس، د پولیسو په لیکوکی د خدمت په حال کی دی او په پام کی دی چی تر ۱۳۹۱ لمریز کال پوری دا شمیره ۱۵۷۰۰۰۰ یو سلو ووپنځوس زرو تنو ته ورسیږی.
د ښځینه پولیسو د پیوستون لړۍ د ملی پولیسو لیکو ته ګړندی شوی او په پام کی ده چی د دوی شمیره تر ۲۰۱۴ کاله پوری ۵۰۰۰ تنو ته لوړه شی.
د امنیتی مسؤلتیونو د لیږد په برخه کی : د امنیتی مسؤلتونو د لیږد لمړی او دویم پړاو په پوره بریالیتوب سره د ټولو امنیتی ځواکونو په ګډو هلو ځلو سره ترسره شوه او دا مهال د هیواد په ډیری سیمو کی، ملی پولیس په مستقله توګه د هیواد والو د امنیت د ټینګولو مسؤلیت په غاړه لری چی دا کړنه ددی ښکارندوی کوی چی د خلکو ملاتړ د ملی پولیسو سره مل دی.
د کورنیو چارو وزارت په ټول توان سره د امنیتی مسؤلیتونو د تسلمیدو د پاره چمتو دی، او په دی لاره کی د هیڅ ډول سرښندنی څخه ډډه نه کوی.
د تجهیز په برخه کی : د افغانستان ملی پولیس دم ګړۍ د تیر کال په پرتله په ښه او مسلکی توګه تجهیز شوی دی، او په پام کی ده چی په راتلونکو دریو کلونو کی د ملی پولیسو ټول تجهیزات اکمال شی.
په روان کال کی ملی پولیسو ته ۲۰۰۰ عرادی زرهی چلونکی واسطی د وړ او ضروری تجهیزاتو سره مل چمتو شوی او د دوی په واک کی ورکړل شوی دی.
د تعمیراتو او رغنیزو چارو په برخه کی : د ملی پولیسو اړوندو منسوبینو ته د ښه وظیفوی چارپیریال د رامنځته کولو په موخه په ټول هیواد کی ۵۲۴ بابه نوی تعمیرونه رغول شوی دی.
یاد رغول شوو تعمیرنه د پوله ساتو پولیسو، د لارو د امنیتی پوستو، د امینتی حوزو آمریتونو او د اطفایی تم ځایونه او تعلیمی مرکزونه رانغاړی.
په پام کی ده چی ۲۰۰ بابه نور نوی تعمیرونه هم د کال تر پایه د سره ورغول شی او د ملی پولیسو منسوبینو په واک کی ورکړل شی.
د اړیکو په برخه کی : د خلکو اړیکی د تیر کال په پرتله د ملی پولیسو سره پیاوړی شوی، خلک دم ګړۍ په خپلو ملی پولیسو د تیر په پرتله پوره اعتماد کوی.
اوس مهال د افغانستان ملی پولیس ددی جوګه شوی دی چی د تیر هرمهال په پرتله د خلکو پراخ ملاتړ د ځانه سره ولری.
د هغی ټول پوښتنی پر بنسټ چی په دی ورستیو کی د ملګرو ملتونو د پراختیایی دفترUNDP په مرسته په هیواد کی ترسره شوی ده، یاده ټول پوښتنه د دی ښکارندویی کوی چی ۸۱ سلنه خلک ملی پولیسو ته درناوی لری.
دا ډول د تیر په پرتله ۸ سلنه لوړوالی ښکاره کوې
په یاد راپور کی راغلی چی ۷۵ سلنه خلک د ملی پولیسو دنده يوه سپیڅلی دنده بولی، چی دا ډول د تیر په پرتله ۶ سلنه لوړوالی ښکاره کوی او همدا رنګه ملی پولیسو ته لاس رسی د اسانی په درشل کی دی.
۵۹ سلنه هیواد وال چی مرکی ورسره ترسره شوی دی په ډاګه کړی ده چی ملی پولیسو ته دا وړتیا په وخت کی رسیدنه اوس مهال یواځی ۳۰ دقیقی وخت غواړی.
چی یاد ډول د ۲۰۰۹ کال په پرتله ۴۲ سلنه لوړوالی ښکاره کوی.
۷۴ سلنه مرکه کونکی چی مرکی ورسره ترسره شوی دی، په خپلو ملی پولیسو پوره اعتماد او اطمینان لری ، ۳۹ سلنه خلک وایی چی د دوی درناوی ملی پولیسو ته د تیر په پرتله لوړ شوی دی.
ډیری افغانان وایی چی د دوی اطمینان د ملی پولیسو پر وړاندی زیات شوی دی، چی د تیر په پرتله ۱۲ سلنه لوړوالی څرګندوی.
همدا رانګه د یوی جلا ټول پوښتنی پر بنسټ چی د بشری حقونو کمیسون د شمال د سیمه ایز دفتر په مرسته ترسره شوی ده ښکاره کوی چی
۸۵ سلنه مرکه کونکی چی مرکی ورسره ترسره شوی دی د پولیسو د کړنو او د دوی د لوری د امنیت د ټینګښت له برخی څخه خوشاله او راضی ښکاری، د یادو ټول پوښتنو څخه دا په ډاګه جوتیږی چی ډیری مرکه کونکی چی مرکی ورسره ترسره شوی د ملی پولیسو دستګاه یوه سالمه او د اعتماد وړ مرجعه بولی.
د ښونی او روزنی په برخه کی : د ښونی او روزنی په برخه کی پراخ او د منلو وړ بدلونونه ترسره شوی دی چی موږ یی څو بیلګو ته ګوت څنډنه کوو.
په ټولیزه توګه د ۱۳۹۰لمریز کال په ترڅ کی ۳۰۰۰۰ تنه د ملی پولیسو منسوبینو، مسلکی او تعلیمی زده کړی په مرکز، ۱۲ دایمی تعلیمی مرکزونو او ۲۷ ټولیو کی د هیواد په سراسر کی ترلاسه کړی دی.
• د سټف کالج د (رهبریت او قوماندانیت) وده او پراختیا
• د ولسوالیو د امنیه قوماندانانو لپاره د ۷ کورسونو په لاره اچونه چی په یادو دوروکی ۴۹۵ تنه د ملی پولیسو افسران د مسلکی زدکړو څخه برخمن شوی دی.
• د رهبریت د څو لنډ مهاله کورسونو په لاره اچونه د کورنیو چارو وزارت افسرانو، لوړپوړو جنرالانو لپاره چی په یاده دوره کی ۱۷۱ تنه د زدکړو تر پوښښ لاندی نیول شوی دی.
• د ملی پولیسو د زدکړو پیلنۍ دوره کړی، د شپږو اونیو څخه اتو اونیو ته لوړه شوی دي.
• د ملی پولیسو استول د لوړو، مسلکی او تخصصی زده کړو په موخه بهرنیو هیوادنو ته.
• د مسلکی او تخصصی زده کړو وده او پراختیا د ملی پولیسو په کرښو کی.
• د ۵۰۰ تنو ځوانو ملی پولیسو افسرانو فارغیدل د ترکی هیواد د افسری د اکادمی څخه
• دم ګړۍ ۲۰۰۰۰ تنه د ملی پولیسو منسوبین د سواد زده کړی په کورسونو کی په زده کړو بوخت دی، چی دا لړی په ټول هیواد کی د پراختیا په درشل کی ده .
• دا مهال څه د پاسه ۱۹۰۰۰تنه د ملی پولیسو منسوبین په مرکز او ولایتونو کی د مسلکی زده کړو د لاسته راوړلو په حال کی دي.
د خصوصی امنیتی شرکتونو انحلال
د ډاډمن امنیت د ټینګښت په موخه د کورنیو چارو وزارت ۵۷ امینتی خصوصی کمپنی تر دی دمه منحلی اعلان کړی، او د روان کال تر پایه پوری ټولی امنیتی خصوصی کمپنی منحلی اعلانیږی.
د ټرانسپورټی قطارونو، اکمالاتو او د پراختیایی او رغنیزو پروژو د امنیت مسؤلیت د کورنیو چارو وزارت په غاړه اخیستی دی.
د پاسپورټ ویش !
د الکترونیکی پاسپورټونو د ویش لړۍ په روان کال کی تر لاس لاندی نیول شوی، په پام کی ده د کال تر پایه د الکترونیکی پاسپورټونو د ویش لړۍ پیل شی، په دی وسیله د پاسپورټونو د کمښت ستونزه پای ته رسیږی یاده برنامه د IOM موسسی په مرسته ترلاس لاندی ده چی په نیږدی راتلونکی کی به موږ د الکترونیکی پاسپورټونو د ویش شاهدان اوسو.
د جنایی جرمونو پر وړاندی مبارزه!
د جنایی جرمونو پر وړاندی د مبارزی په برخه کی په روان کال کی ۳۰۵۱ جنایی پیښی په مرکز او ولایتونو کی پیښې شوی دی، چی د یادو پیښو په تړاو ۳۵۹۵ تنه نیول شوی دی او د هیواد عدلی او قضایی ارګانونو ته معرفی شوی دی.
د ترهګرۍ پر وړاندی مبارزه!
د ترهګرۍ په وړاندی مبارزی په برخه کی د ملی پولیسو منسوبینو ۲۰۷۵ مستقل او ګډ چاڼیز عملیات ترسره کړی دی چی په پایله کی یی ۲۵۰۰ تنه مسلح مخالفین نیولی دی.
۳۳۶۹ تنه هلاک او همدا راز ۴۱۳۰ میله بیلابیل ډوله وسلی او ۳۳۶۹ کړۍ د سایطو ضد ماینونه کشف او هغه توکې یی چی د شنډولو وړ وو له منځه وړی دی.
د وسلو د را ټولو په برخه کی!
د روان کال په ترڅ کی ۶۲۷۱ میله بیلابیل ډوله وسلې د غیر مسولو کسانو څخه را ټولی شوی او د ډایاک پروسی ته سپارل شوی دې.
د نشه یی توکو د کشف او ضبط په برخه کې!
د روان کال په ترڅ کې ۱۲۰۵، تنه مخدره توکی، ۶۷ تنه کیمیاوی توکې، ۴۲۵۴۵ بوتله شراب د ملی پولیسو د منسوبینو له لوری کشف او ضبط شوی او د پيښو په تړاو ۸۴۸ تنه مظنونین نیول شوی، ۳۳ بابه د مخدره توکو د تولید فابریکی او لابراتوارونه ویجاړ او همدا رنګه ۲۴۸۷۵۳ جریبه کرل شوی ځمکه د مخدره بوټو د کرکیلی څخه پاکه شوی ده.
د پالیسی په برخه کی!
د پالیسی په برخه کی د کورنیو چارو وزارت لاس په کار شوی دی تر دی، دمه یی ۷ ټوکه پالیسۍ چی دا مهال د هغوی لرلو ته ډیر ضرورت و، تدوین کړی او ټولو قطعاتو او جزوتامونو ته یی ویشلی دی.
د ملی پولیسو منسوبینو د امنیت پالیسی، د معلوماتی ټیکنالوجی پالیسی، د شفافیت (رڼوالی) پالیسی، د سرحدی مسایلو پالیسی، د خصوصی امنیتی شرکتونو د لیږد پالیسی، د معاشاتو د ویش پالیسی او د لوړ پوړو شخصیتونو د امنیت د ټینګښت پالیسی د یادولو وړ دی.
زندانونه!
د ثور د میاشتی د ۲۹ نیټی د وزیرانو شورا د ۶ نمبر مصوبی پربنیاد د زندانونو د لیږد مسؤلیت د عدلیی د وزارت څخه، د کورنیو چارو وزارت ته د جدی په ۲۰ نیټه په رسمی ډول د کورنیو چارو وزارت ته وسپارل شوه.
د کورنیو چارو وزارت د زندانونو د څیړنی کار په لمړۍ مرحله کی د یو با صلاحیته کمیسون له لوری پیل کړی او په دی برخه کی لازم اقدامات تر دا مهاله ترسره شوی دی.
د زندانونو د وضعیت د څیړنی او بهبود په برخه کی تر دی دمه د کورنیو چارو وزیر د هیواد ۱۲ ولایتونو ته کاری سفرونه ترسره کړی دی او په دی موخه تر اوسه د هیواد د ۱۵ زندانونو مسؤلین د کارونو د ښوالی په موخه تغیر او تبدیل شوی دی.
